Asih sajati

Asih sajatining asih
Salahsahiji bukti,...
Asihna Dzat anu maha asih

Ngawujud,....
Dina wujud, anu sok disebut indung
Mangrupa,....
Dina rupa, anu sok disebat bapa


Asih sajatining asih
Istuning wening, sepi pamrih
Lana salawasna,...
Teu kawengku ku wates jeung waktu

Nganjang ka Alam jaga

Tarahal jalan anu keur disorang

Nganteurkeun sawangan, nganjang ka Alam jaga
Nyurup kurung,  nyanding kuring
Nepungan lelembutan, anu ngalungsar dina implengan

Hawar - hawar, kedéngé sora anjeun tipatengahan
Nitah Si.cikal ngabalikan deui baca an na,
Pédah aya kalimah anu salah
Singhoréng henteu gaplah,
Salila ieu anjeun ngawarah
Timimiti  alif - alifan tug nepi ka ngéjah

Si.bungsu, katinggali ngagebra tibra dina lahunan
Meureun harééngna geus mimiti rerep
Sanggeus rungsing méh sapeupeuting
Maksa anjeun ngabungbang maturan kahariwang

Teuing timana datangna,
Salaksa rasa, dadak sakala ngagalura jeroeun dada
Aya sugema jeng tumarima. Aya éra jeung rumasa
Rumasa tacan biasa pangmukakeun lawang bagja.

Sangaran béda rupa

Hampura jungjunan,...

Lamun ayeuna sulaya tina subaya

Lain pédah suda tina kanyaah

Lamun ayeuna jalir jangji

Lain harti sepi tina kaasih

      Kamari urang kungsi paheut pasini

      Seja babarengan naratas jalan  kahirupan

      Kamari urang kungsi paheut pasini

      Seja babarengan mipit buah kabagjaan

Ayeuna ku kuring kakara kaharti

Anu di sebut bagja, ceuk anjeun jeung ceuk kuring

Singhoréng ukur sangaran béda rupa

       Anu di sebut bagja ceuk anjeun,...

       Ibarat ngamplangna cai sagara

       Sedengkeun bagja ceuk kuring

       Ukur nyangkrungna cai ibun dina congo daun

        

Anjeun jeung waktu

Palangsiang waktu geus mimiti mintul
Naha teu sanggup mupus kalangkang anjeun
Peuting tadi ngajanggélék deui
Minuhan rohangan pangimpian
Ngagelenyu mintonkn imut, asa kunyari liwat tisasari
Imut anu kungsi ngapungkeun angen - angen
Ngumbul ngajaul ka alak paul
Ngalanglang patamanan kahiyangan
pirajeunan, naruk pucuk tangkal kasatiaan
Ditiruk, paké nyiuk cai kahuripan
Pikeun nyimbeuh kadeudeuh maneuh

Hanjakal teulana,...
Langit kulawu, Kalimpudan méga hideung
Kahéman ngan kari ngaran
Tangkal kasatiaan,...
Anu ngarandaka, mapaésan palataran rasa
Dadaksakala ngarangrangan
Nungtutan peunggas marékplékan
Kiwari anu dumuk saukur tunggul
Pamohalan bakal sirungan.

Kembang kamelang

Kamari soré, di pasampangan

Basa dampal leungen urang pataréma

Sajorélat, ngolépat dina implengan

Carita lawas mawa waas

Ngageuing asih anu bihari

Ngahudang nyaah anu baheula

Anu kungsi numpi jeroning ati,

Dipindingan ku pasini

Mepet sila jeroeun dada,

Disimbutan kusubaya

Hanjakal kiwari geus lain bihari

Hanjakal ayeuna geus lain baheula

kiwari asih kasampih ku wanci

Ayeuna nyaah kapungkas ku mangsa

Dalingding seungit malati

Lengit dipaling hiliwir angin

Ligar hégar campaka

Ilang diiwat hawa katiga

Kembang kamelang

Maluguran niban lemah

Marengan nyaah

Anu udar lain wayah

Dina congo peuting

Nyelecep tiis hawa janari

Nyulusup tina sela jandéla

Diaping jempling, 

Anu ngagawing dina congo peuting

Ngajadi saksi bedahna cimata

Anu juuh,,maseuhan amparan karumasa

Rumasa lampah katalikung amarah

Kalangsu dina gedurna nafsu

Anteng katalimbeng

Ngangkleung di tengah - tengah sagara nirca

Teusadar di dunja ukur sajorélatan

Mangsana tepi kana pinasti

Hirup kapungkas ku pati

Najan nyaah, najan betah

Wayahna kudu mulang, 

Pamohalan bisa mungpang

Cag banda, cag baraya

Cul dulur, cul batur

Hamo aya anu bakal di bawa

Saukur ngajurung tepi ka lawang kubur

Anging lampah hadé jeung goréng

Anu bakal ngabuah bagja atawa bahla

Garut Pangirutan

Kuring ka irut,.....

Lain pédah cenah éndah pangirutan

Tapi keur kuringmah, sarakan pangbalikan

Tapak lacak léngkah munggaran

Najan léngkah kahirupan,

Mawa waruga, tepi ka tungtung dunja

Tetep baris jadi jugjugan

Jadi tempat reureuh mangsana leuseuh

Saenggeus weureu seubeuh,

Neureuy peuheur buahna hirup

Cikuray anu ngagupay,

Papandayan ngagentraan

Sampireun pikeun sampeureun,

Di Bagendit fikir ngait

Cangkuang pangeunteupan rasa kamelang

Batin liwung,..

Midangdung gumebyar hurung layung

Anu mayungan punclut gunung Guntur

Wanci soré, lamun pareng hadé poé

2013

Taun heubeul, sakeudeung deui baris mungkur
Taun anyar, sakeudeung deui baris disorang
Sagala rasa, kuciwa jeng katugenah
Anu pernah aya,..
Dina sela rasa sugema jeung kabungah
Gera teundeun dina katineung
Geus tepi kana wanci
Pikeun mapag harepan anyar
Dina lambaran kahirupan anyar